Dr gstohlnig Root
Vom gstohlnige Hägendörfer Root
(Quelle: Elisabeth Pfluger)
D Hägedörfer hei ne grüsligi Meinig mit ihrer Holzlarve, em Root, und das mit Rächt. Im letschte Johrhundert isch ne die chöstlige Maske aber einisch abhande choo. Das isch esoo gange:
Wies au i de angere Dörfer brüüchlig gsi isch, si d Hägedörfer am Fasnechtsundig mideme Fasnechtwage und eme Schnitzelbank s Gäu uuf und ab gfahre. Natürlig hed ihres Prachtstück, der Root, mitmüese. D Egerchinger hei sälbzyt zwar e Teufel und e Häx gha, aber ekei Root me. Drum hei ne Chuppele Egerchingerburste der Hägedörfer Root näbenuus glöckled, heinem d Larven abgrisse und gstole. Wills scho ums Ynachte gangen isch und alli guet ghabered gha hei, isch de Hägedörfer erst deheimen ufgfalle, as si ihre Root nümm heige.
Jetz isch men im ganze Dorf fast verworged vor Chyb und Täubi. Me hed gluegt usezdiftele, wo as d Schelme dä Root ufbewahre. Es isch aber es paar Johr gange, bis mes gwüsst hed, will d Egerchinger millionisch uf der Huet gsi si.
Derno hei d Hägedörfer Nachtbuebe ganz e schlaue Plan usdividiert. E hübsche, flotte Burst hed zum Schyn i sälb Huus uf Egerchinge zumene Meitschi z Chilt müese. Dä Burst isch s Jöörs Kasi gsi und das Meitschi ne Schwester vom Lehrer Meinrad Rauber.
Wo der Kasi bi das Raubers Meitschene afe chli verwarmed gsi isch, hed er einisch so näbehi d Sprooch ufe Root brocht. Die Meitschi heinem versproche, am nöchste Chilttag welle si nem die Larve de zeige. Besser häds es füre Kasi nit chöne schicke, für sie Streich yzfäädle. Wonem derno di ahnigslose Meitschi die Larve ufe Stubetisch bringe, heds em gschälleled. Wie ne Wätterlaich packt er der Root, springt dermit usen und ab.
Bis si s Raubers Meitschene vom Schrecken erholt und d Egerchinger Chnabe alarmiert gha hei, hed der Kasi scho ne schöne vorsprung gha, Hägedorf zue. Bim Lingehag, a der Gränze zwüsche beede Dörfer, hei sini Kamerade ufen gwartet. Der best Läufer hed em d Larven abgnoo und isch dermit wyterdechled, alls im gstreckte Galopp, Hägedorf zue.
Wo d Verfolger vo Egerchinge här si cho z springe, hed se d Hägedörfer Chnabeschaft bim Lingehag ufghalte und id Hüpple gnoo. Es hed e mordsmeessigi Rumpussede gee. Di usgrueiede Hägedörfer hei d Oberhang gha, will si au no inere starche Überzahl gsi si. Drum hei di enttüschte Egerchinger Nachtbuebe müese der Schwanz zwüsche d Bei chlömme und heizue hülpe.
D Hägedörfer Bursten aber si vom ganze Dorf als Syger gfyred worde. Und s Jöörs Kasi hed vo dört ewägg als Dorfheld so öppis wie ne Glorieschyn gha. Soo vill hed de Hägedörfer ihre Root gulte !